Kryeministri në detyrë, Albin Kurti, deklaroi se kandidatura e Albulena Haxhiut për kryetare të Kuvendit të Kosovës është vendim i partisë dhe nuk do të tërhiqet.

“Mos ta bëjmë këtë lojë negative. Duhet të respektojmë propozimet e njëri-tjetrit dhe të kemi një kryesi [Kuvendi] të bazuar në meritë”, tha Kurti në një intervistë për RTK.

Përkundër dështimeve të shumta në votimin e Albulenës Haxhiu, propozimi i Lëvizjes Vetëvendosje për kryeparlamentare, Kurti ka thënë se tashmë problemi thelbësor nuk është emri i kandidatit, por mënyra e votimit.

Kurti tha se opozita duhet të pranojë votimin e fshehtë për zgjedhjen e kryeparlamentarit.

“Nesër nuk është në pyetje Albulena, që është propozimi ynë, por është në pyetje pikërisht komisioni për votimin e fshehtë. Nëse opozita janë të sigurt që Albulena nuk kalon përsëri, le ta provojmë me votimin e fshehtë. Dhe porsa të konstituohet Kuvendi, si kryeministër në detyre, si kryet i VV-së, do t’i kem 61 vota minimum për qeverinë e re. Por, paraprakisht na duhet Kuvendi”, ka thënë Kurti.